反町隆史愛妻菜菜子做時代女性同拜金女郎大家就見得多，盛傳好想生仔嘅佢湊起細路時又會係點樣呢？日本某飲品廣告商最近就冧掂菜菜子同日本出名嘅少年藝人竹下恭平，拍咗個好有童真嘅綠茶廣告。
呢個廣告有兩個版本，其中一個講年紀細細已經有性幻想嘅竹下，正當睇漫畫入面嘅接吻場面睇到入晒神嗰陣，菜菜子突然好似小妹妹咁坐滑梯喺佢面前出現，重拎住支綠茶畀竹下，叫佢清醒一下喎。
大家唔好睇個廣告好似好慳皮好簡單，以菜菜子咁嘅級數嚟講，拍親乜製作單位都隆而重之，呢個好似一般簡陋遊樂場嘅場景，其實都係特別搭建而成。
再睇吓菜菜子為呢隻綠茶而拍嘅另一個版本廣告，今次佢做番老本行，扮成大美人，企喺一棵盛放嘅櫻花樹下甜甜一笑，由於廣告喺二月拍，當時日本大部份地區櫻花都未開，於是工作人員惟有用鐵架一支支搭成呢棵幾可亂真嘅櫻花樹。聽講有人睇完個廣告之後，重特登打去問菜菜子喺邊度搵到咁嘅靚景㖭。