雖然話市道唔多好，但係買樓做業主點都應該開心，更何況收樓。偏離市區嘅東涌，得到唔少想遠離鬧市嘅買家歡心。區內藍天海岸上個禮拜尾開始收樓，發展商話賣咗六百幾個單位，會分批出信通知業主收樓入伙，𠵱家已經有一百伙收咗樓，希望成個收樓程序喺下個月中之前搞點。
香港興業好識做，準備咗大批豐富入伙禮品送畀業主，雖然唔係好貴重，只值幾百蚊，勝在夠心思。禮包有個人清潔護理用品，最啱𠵱家個個都注重衞生嘅時候用，重有糧油雜貨同飲品，照顧新居入伙需要。
如果業主想同個單位睇吓風水，發展商喺今個禮拜六日同下個禮拜日，喺收樓處安排咗風水師楊天命解答家居風水問題。重有一系列提供家居裝修設計、家居保險等商戶，喺現場擺檔提供服務。
非典型肺炎搞到樓市雞毛鴨血，樓價如坐滑梯，但估唔到喺劣勢下，竟然有短炒獲利情況出現。
美聯物業海栢花園分行主管譚兆濤講，呢個單位係馬鞍山雅典居三座中層B室，千幾呎，喺三月中以二百四十萬成交，買家原本諗住自住。但美記同事同佢傾開，話有客想搵呢個呎數嘅單位，𠵱家美伊開戰同非典型肺炎爆發，後市唔多樂觀，加上計落有錢賺，不如先出貨，睇定再作打算。個客諗吓都有道理，所以拍板以二百五十三萬賣出單位。
譚兆濤話，扣除使費，有約三萬蚊落袋。
住宅樓價係咁跌，新低成交時有聽聞。中原地產研究部做咗個統計，屯門嘅新屯門中心今年第一季，已跌入低價屋苑行列，即係所有成交價都低過百二萬。舊年同期有九成。舊年第一季新屯門中心嘅三房單位賣到一百三十五萬，𠵱家只值百一萬。
𠵱家最可能變成低價屋苑嘅係九龍灣淘大花園同荃灣嘅荃灣中心，兩個屋苑超過九成買賣都低過百二萬。跟住就輪到紅磡黃埔新邨、大埔中心同天水圍嘉湖山莊，低過百二萬嘅成交佔咗八成以上。中原估計，非典型肺炎短期內解決唔到，會有更多屋苑列入低價屋苑行列。今年第一季價值三十萬至百二萬嘅低價二手私人住宅成交有約四千一百宗。
過幾日就係復活節，肺炎疫情未有好轉迹象，零售商戶苦不堪言。新地旗下十二個商場，復活節期間推出優惠吸引消費者，希望可以幫到商戶。
凡在商場內購物滿三百蚊，以最多兩張發票計，可以獲贈包括口罩、氯丸同消毒噴霧嘅抗炎三寶，重可以有三個鐘免費泊車優惠。新地會喺商場做足消毒同清潔措施，令消費者安心購物。
最近傳染病肆虐，地產經紀要見客，中招機會自然較一般人高。蘭西收到料，外資測量師行第一太平戴維斯高層，有人不幸中招。
據該公司員工講，公司即時將辦公室消毒，重發出內部指引，員工可以即時放假至下個禮拜二，即二十二號。雖然非典型肺炎令人心惶惶，但可以提早放復活節假，對每一個打工仔嚟講都算係好消息！
肺炎疫情未有好轉，好多行業生意大受打擊，代理業內人士話，最近佢公司原本同個客傾掂咗單租務，係中半山一個豪宅單位，月租六萬，對方係租畀一個日籍員工居住，點知因為非典型肺炎爆發，個日籍客突然縮沙唔嚟香港。
因為交易未簽字落實，所以代理行眼白白冇咗單大額租務，見財化水。睇嚟呢啲個案應該都唔少。
蘭西
電郵地址：
