車婉婉向來在圈中人緣不錯，近日更接拍無綫新劇《皆大歡喜》時裝版，同劇演員和婉婉的好友均十分擔心。
薛家燕：
我同婉婉媽咪車綺芬以前好熟，我聽到呢個消息都好唔開心同難過，希望婉婉可以收拾心情去面對。我覺得呢個時候都唔係好方便打電話畀佢，怕會造成騷擾，不過婉婉呢幾日拍嘢都好專業同投入，佢真係要好好保重，有需要可以搵我幫手。
趙學而：
我相信婉婉可以自己處理到呢件事，我之前都有同佢傾過，但始終唔知成件事嘅詳情。
苑瓊丹： 我呢幾日都唔方便打電話畀佢，我會盡量唔喺佢面前提呢件事，佢要幫忙一定會出聲。我相信婉婉份人夠冷靜，呢件事應該唔會影響到佢嘅工作。
梅小惠：
我都認識婉婉同佢媽咪，對於判決都好愕然，希望婉婉可以堅強啲去處理呢件事。
鄧兆尊：
我都知佢屋企呢幾日有事，但我唔知當中涉及款項有幾多，至於話婉婉要即時搬屋，我唔相信車氏連幾千萬現金都冇，𠵱家咁嘅巿道層樓唔係話放就放，婉婉一向都緊張佢媽咪，但好多嘢都整定，做嘢都係要正路啲。
梁漢文：
我之前都有聽過婉婉媽咪件事，不過呢啲事始終都同法律有關，所以我都唔方便作任何回應，但係我今晚一定會打電話問候佢。
採訪：卓美娟、李珮洳、比華利
