鄭少秋曾經主演過《大時代》同《世紀之戰》兩套以股市為題材嘅劇集，相信講起呢兩套劇，唔多唔少都會惹起股民嘅回憶，因為呢兩套劇播映時，股市咁啱都會遭殃。
九二年喺無綫播映嘅《大時代》，秋官飾演丁蟹一角，點知當時港股即刻出現小股災，而亞視二○○○年播映《世紀之戰》，秋官飾演嘅丁野重出江湖，港股就立即連跌七日，七日裏面跌咗成二千五百幾點，而喺《世》劇大結局後，丁野一死，股市即升三百點，真係唔好唔信邪！
「秋官效應」又再重現？亞視上月尾晏晝時段開始重播《世紀之戰》，點知股市啱啱又開始急挫，噚日重跌至八千五百幾點，都咪話唔慘。雖然香港𠵱家嘅經濟環境唔好，況且又遇着美國同伊拉克打仗，加上非典型肺炎肆虐，所以股市下跌係自然事，不過賭仔姓賴呢樣嘢就係人都明白，況且今次秋官出現，咁啱股壇又大跌，唔通秋官真係股壇剋星？
李彩樺（Rain）噚日去港台出席一個健康節目，佢話近排整咗好多靚口罩。Rain可算係一個手工藝叻、又識煮飯嘅女仔，似足賢妻良母，阿Rain就話：「係呀！我都諗住嫁，不過𠵱家未有對象，希望快啲搵到啦！有冇人暗戀我都唔知，暫時冇男士向我表白。」而正在為新唱片錄音嘅阿Rain同正東唱片嘅合約已滿，新唱片或者會由EMI發行。
周杰倫前晚喺北京工人體育館北門廣場，以代言人身份出席某內地鞋品牌嘅記者會。周杰倫一出場，現場幾百名fans就發晒狂，有啲重衝上舞台，所以周杰倫出嚟亮相咗短短十幾分鐘，就急急腳走人。之後周杰倫接受內地傳媒訪問時，驚再有混亂情況發生，所以有兩個保鑣傍住佢做訪問。
復活節檔期中首先上畫嘅電影《失憶𠝹女王》，上咗四日約收三百七十萬，喺呢個非常時期，成績算唔錯。齣戲上映之前，聽聞套戲嘅男主角古天樂好緊張票房，因為今次係由佢一個人孭飛，套戲收唔收得就證明佢嘅票房能力，𠵱家套戲有咁嘅成績，佢應該可以放心，而中國星都決定今日搞慶功宴，兩位主角古天樂同應采兒都會出席。
陳百祥（阿叻）同譚詠麟（阿倫）老友鬼鬼，但早幾日有消息話佢哋打交。阿叻噚日做完電台節目後，就同記者話：「冇可能會有咁嘅事，我哋兩兄弟一生人點會打交，唔知點解會咁傳。」至於黃杏秀生日，佢話：「我有史以嚟送最平嘅禮物畀佢，就係兩隻佢近排最鍾意嘅精選唱片，兼安排鵲局。其實價錢幾多唔緊要，最緊要係個價值。」
