肺炎控制尚未成功，建華與局長們仍須努力。本港經濟仍未見底，美林與ING霸菱等證券行繼續調低本港經濟預測。已削減42%航班的國泰（293）表示，唔排除再進一步削減航班。此外，樓價亦勢將繼續下調，港股焉有不跌。恒指收報8533，跌112點，成交62.06億元。
國泰雖話無計劃全線停飛，但股價噚日仍大跌6%，收報8.40元，成交達3億元。國泰削減航班後載客率只得1/3，真係唔飛好過飛，其實全線停飛可以減少虧損，反而對國泰有利。若特區政府大發慈悲，向國泰施以援手，避免全面停飛，可能對國泰股價起更大作用。不過，阿虎當然唔敢因此而博國泰反彈。
銀行股噚日沽壓明顯大增，高盛與大摩大手沽貨，恒生跌3.2%，收報75.50元，成交高達5.74億元。雖然其後見到瑞銀華寶入市力接，但就似乎力不從心。美資所羅門又再調低滙豐（005）目標價，似乎美資今次似要聯手質低銀行股。
據聞勝獅貨櫃（716）原本諗住挾上3元樓上批股，點知上月21日挾上2.775元後，港股受到非典型肺炎疫症打擊，勝獅股價輾轉滑落。公司噚日終於決定停牌，搵荷銀批股6000萬股，每股2.15元，集資1.29億元，配股價較停牌前折讓10%。
據聞唔少投資者嫌折讓幅度細，所以唔敢接貨，部份畀面接貨者，亦打算復牌後即沽，所以復牌後股價可能受壓。
華德豐（297）噚日停牌，市場傳公司沽出6000萬元物業組合，減債有望。若傳聞屬實，相信復牌後必有炒作。
阿虎