近排人人都黐家，在家發呆搵事做，搞到今期乜都玩DIY。讀Fashion的Joey要等到月尾先至再「開學」，曉得揸針穿線做吓手作仔，自然唔會浪費一身好武功，今次做布公仔就更加Easy，跟住呢本麥嘜工具書內的步驟，就可以做到呢隻勁多人捧的「本地豬」同埋佢班朋友，重有唔同程度嘅有型方法將公仔掛上身，係今期必學的DIY！
記者：招佩珊 攝影：陳陶鈞 ImageGirl：Joey
Joey可不是麥嘜麥兜Fans，但看見這本教大家做布公仔的工具書，亦大叫：「好得意」，無他，書內教做的布公仔，是由小朋友到大人都捧場嘅麥嘜、麥兜、菇時及阿輝。書內有齊各種基本針步、紙樣及清楚列明各個縫紉步驟，只要跟住做，就算DIY新丁也能30分鐘搞掂！何況，做齊麥嘜等主角所需的布料亦已配好，毋須為買齊不同顏色的布料而費神，夠晒方便。
就算是新手唔使怕要自己左度右度，只要照住紙樣同書內的指示逐步做，不消30分鐘就可似做到隻麥兜，睇完Joey做公仔的過程，就知道其實有幾容易。
自備材料：針線、繡花線、大頭針、鉸剪、棉花、過底紙、白膠漿
店舖資料
（a） 春田花花幼稚園
地址：灣仔活道24號地下
電話：28915211
（b） 黃巴士專門店
地址：杏花邨地鐵站杏花新城G20舖
電話：25059230
這是麥嘜縫紉工具書的第二集，今次麥兜是主角，除了教你做隻肥豬仔外，更可以跟住本書學做泳裝、睡衣、校服等唔同衫畀麥兜換，估唔到連豬仔都好似少女們勁煲的大眼妹公仔Blythe咁，玩埋換衫仔。
係香港專業教育學院讀Fashion嘅Joey潮流觸覺相當敏銳，搵佢示範做公仔之餘，順道問佢除了作擺設之外，隻公仔重有乜用途，佢諗咗唔使二十秒，就隨手示範7個型到震的用法，想型，就要偷師！