曼聯領隊費格遜響周日足總盃出現喺自己地頭奧脫福球場，睇實聽晚場英超聯「冠軍前哨戰」對手阿仙奴嘅表現。不過我求大俠就覺得，佢睇晒場波都應該冇乜收穫，反而重好可能係睇錯波探錯軍情𠻹！
呢場喺曼聯奧脫福中立場上演嘅足總盃準決賽，阿仙奴雖以一比○擊敗錫菲聯晉級決賽，不過佢哋表現平平，冇咗之前響呢個賽事淘汰曼聯及車路士嘅霸氣。亨利及皮利斯等主將又無份踢正選，就連韋拉都係踢半場多啲就被換出，相信費格遜就算幾金睛火眼昅實，都睇唔到阿仙奴啲真功夫。
你話如果費格遜係選擇飛過去西班牙，學吓人哋點樣大破皇馬嘅話，係咪重有得着呢？
祖記前晚對博洛尼亞靠甘莫蘭尼斯補時四分幾鐘入波，好驚險攞番一分，簡直係季初和帕爾馬二比二嘅翻版。你固然可以話佢哋有運，但亦要讚吓球員有鬥心同埋夠團結。或者你會問點解意大利波硬係補時咁長，查實你諗諗佢哋比賽犯規多，成日吹停，補時多都係合理嘅。呢個係佢哋獨特足球文化，好難改變。
最近李鐵同埋孫繼海各自喺球會失去正選，李鐵就平常心去睇，只要自己做好本份，保持住狀態去等待重拾正選嘅一天來臨；不過孫繼海就有啲心灰意冷，重暗示唔排除季尾可能離隊㖭。計我話愛華頓來季有得踢歐洲賽機會好大，前途一片光明，相反曼城就愈踢愈沉，再係咁來季要降班都唔奇，畀我係「老孫」都嗌走鬼啦！
東岸榜首形勢本來係三強鼎立，不過七六人自從高文同雲漢兩大主力傷出之後，隊波就即刻跌晒Watt，連輸兩場；好似噚日對黃蜂一仗，就算艾華遜攞咗三十分同十個助攻都唔掂。鬼咩，艾華遜自己都未好得番晒，𠵱家又少兩件大將，難怪啲人話七六人嘅隊名Sixers應該改做Sickers，即「病人隊」先啱啦！
大家都知溜馬有咗阿達斯呢個惹火尤物之後，已經成為聯盟嘅「新壞孩子」。噚日佢哋撞正有出名口臭嘅披頓在陣嘅公鹿，就正宗係火星撞地球。成場波兩隊夾埋有成五十七次犯規，技規都有成十一次，我求大俠覺得最頂癮係溜馬教頭湯馬士都躁埋一份，掟爛塊戰術板搞到自己食咗次技規，真係上樑不正下樑歪。