這個瘟疫假期令外甥們愛上了看武俠小說，難得他們小小年紀不怕一大堆的文字，當然盡量供應。看完了射鵰、神鵰與倚天後，改改口味，開始看古龍的作品。
「金庸與古龍的武俠小說有何分別？」外甥問。
「金庸的作品情節與人物較豐富，歷史背景亦較濃厚；古龍的則較像占士邦，味道也較孤獨。」
看古龍的作品，入門最好先看《陸小鳳》、《楚留香》、《絕代雙驕》與《多情劍客無情劍》。
「陸小鳳的手指可唔可以夾得住西門吹雪的一劍？」外甥問。「吓？得啩？」心裏自知答得不夠信心。
「《幽靈山莊》裏的犬郎君為何可以扮成一隻狗但又不被發覺？」「吓？或者佢個樣好狗啩？」
「小李飛刀點解咁煩？明明自己鍾意人，但又要讓畀老友，讓完又唔捨得，日日揸住嚿木嚟雕。」這一句可說進心裏去，大表贊同。
「咁你估究竟陸小鳳好打啲定係楚留香好打啲？」
「吓？我諗應該……唔知喎，佢哋兩個好似冇碰過頭，未對決過」。
「唔係喎，我打嗰個OnlineGame，如果玩得叻，可以請陸小鳳或者楚留香做保鑣，如果咁橋Online撞到，佢哋可以決鬥個喎」。「有啲咁嘅事?!」
於是，當晚由外甥教我打OnlineGame。陸小鳳與楚留香可以在虛擬世界決鬥，相信古龍先生做夢也想不到吧？