近來市面好多食店一味鬥平，甚麼$10碗麵、$15碟頭飯，係就係食得飽你，但講到食物品質，真係完全欠奉。最近小記行過旺角登打士街逛咖啡館，發現有間幾正嘅Cafe，聽呢度啲「啡客」講，老闆係一個咖啡癡，嚟呢度飲就係貪佢沖咖啡手法夠正宗，完全拍得住酒店水準！
不過唔好以為價錢會好貴，呢度嘅外賣咖啡$15有成兩杯（$8?1杯），但須知道佢係用正歐洲最多人飲用嘅LAVAZZA咖啡豆，而且重要係即叫、即磨、即沖，真係正所謂酒店質素、茶餐廳價錢！
另外，Cafe重新出咗兩款蛋糕，野莓脆餅嗰層野莓醬足足有成半吋厚，味道酸酸甜甜，雪凍後連脆餅食好好口感；維也納朱古力蛋糕好濃味，鬆軟嘅蛋糕面鋪上一層成個$10銀仔咁厚嘅朱古力醬，絕對係超重份量！價錢都唔算貴，$24一件送一個餐茶咖啡，當下午Tea一Tea，都相當唔錯。
記者、攝影：朱崇德
加勒比海
電話：23326433
地址：旺角彌敦道579號6號舖地下