非典型肺炎肆虐，學校提早放復活節假期，學生哥唔使返學，亦唔准出街玩，要成日留喺屋企，新鴻基地產副主席郭炳江噚日同八方講，凡事應該從好方面諗，今次正好製造機會，令一家人更融洽。
佢話近排同太太傾偈都多咗，又可以趁機教個仔捉象棋。「我唔教佢『鋤弟』，淨係教佢象棋。我讓佢一隻車。」雖然「老竇」讓「單車」，但初初學象棋嘅郭家公子，依然有輸無贏。郭炳江話：「我晚晚同佢捉幾盤棋，多數都係我贏。佢輸得多就發𤷪，咪搵一、兩盤輸番畀佢囉。」
郭炳江又話，呢次肺炎事件，大家都上咗寶貴一課：「呢個教訓對我哋都好大，意識上知道生命嘅寶貴、社會嘅和諧相當重要，唔好再去批評任何一個人或政府，其實，我哋份內其實有好多嘢可以做。」
全力抗炎係新地現時首要任務，據郭炳江講，就連郭老太亦身體力行，上周日同郭炳聯到新地旗下商場了解商戶情況，亦為商戶打打氣：「你知我媽媽都係高危人士，但佢都親自落商場巡視。」
傳真︰2623-9278
電郵︰