經紀黃品題嘅中國外運（598）仍未見異動，佢解釋話，噚日大市下跌112點，隻股又咁大隻，股價平收2.175元，已經算叻仔。據聞稍後陸續會有證券行唱好，所以唔使太擔心，等多一等應該有收穫。
另外，由於呢排基金繼續垂青小型工業股，唔少中間人都想搵番一兩隻實力股做推廣，最好係搞埋批股，賺多筆佣金。所以稍有潛力嘅股份，都被人睇到實，但炒唔炒得起，當然係另外一回事。
好似生產高爾夫球桿嘅順龍控股（361），由於更改年結日，今日會公布02年9個月業績。公司舊年年底，公布截至9月底半年業績，股東應佔溢利較同期上升1.31倍，約1364.7萬元，如今事隔只係3個月，相信業績表現唔會太走樣。
加上順龍早排獲批一項為期3年的1.05億元銀團貸款，公司借到錢，即係信用獲承認。隻股噚日平收0.97元，若業績對辦，可以短炒一轉。
慕容小初