非典型肺炎之戰搞到全港公立醫院差唔多冚晒檔，沙田威院首當其衝，一早大叫救命冇人聽，其中最唔怕得罪人嘅係中大中醫中藥研究所管理委員會主席梁秉中。
梁秉中做過全國人大代表，係中大新亞書院前院長、中大醫學院矯形外科及創傷學講座教授，重係專門去內地治療肢體有問題嘅「關懷行動」總指揮，甚有江湖地位。威院出事之初，佢見楊永強死都唔肯面對現實，只好上電台講，向報紙投稿，接受訪問大鬧，甚至帶埋記者上廣州拍大陸醫院嘅實情，目的係叫人唔好對高度傳染嘅SARS掉以輕心。
時至今日，雖然未有解藥，但係全球都響起警號，北京都認衰，梁秉中發火都算做有用，正如佢喺本SARS新書中引述卡繆名句：「瘟疫期中不存在英雄或聖人」。當日叫梁秉中「如果咁驚，不如返屋企唔好返工」嘅醫管局高層，有乜感想呢？
（圖）梁秉中為非典型肺炎怒吼，但竟然俾人叫佢返屋企唔好做。
傳真︰2623-9278
電郵︰