冇乜意外，個市又跌多1日，恒指再唔見112點。冇法子，有隻國泰（293）大秤陀喺度俾人掟，連帶相關恒指成份股如太A（019）同中信泰富（267）都冇運行，指數有乜計仔可以唔跌。
股票難搵食，窩輪更加係。摷吓有乜啲窩輪唔好買，好容易；搵啲窩輪值得買，好困難。有啲股份唔跟大市跌，例如中石油（857），收1.67元，升1格，相關Call輪，數據本來唔錯，諗得吓，但計清楚，又係不過爾爾。
中石油Call輪9232，收9.7仙，升0.2仙，11月到期，負溢價2.3%，槓桿率17.2倍。
正股有末期息7分人民幣，除息計，隻輪有溢價1.3%，本來都算有啲吸引力，只不過正股波幅細，又驚住油價戰後再散，正股唔升得。正股冇勢，Call輪話之你數據點靚都好難飛得郁。
華能（902）最低7.20元，跌30仙，收7.45元，跌5仙，芬佬舞上舞落，似乎唔想隻股急跌。啲Call輪有冇得諗？9728今年9月到期，現價1.07元，溢價1.6%，槓桿率7倍。正股末期息34分人民幣，計埋股息因素，隻輪溢價實際去到6%嗰頭，又係諗唔過。9401數據靚啲，表面負溢價3.2%，但實際都有個幾巴仙溢價，又冇乜成交，冇得諗。
章盛