特首同楊永強喺各方施壓下，終於公布咗SARS病患者嘅居所資料，等大家可以加以防範，其實如果佢哋肯早啲公布，中招嘅人可能會冇咁多。
有心水清之人就同八方講，份疫廈名單中，鄉村地方染病嘅人比較少，咁都一啲唔出奇，村屋附近空氣流通，又冇城市咁擠迫，啲冠狀病毒可能難以生存。
講開空氣好，八方發現最近多咗人帶小朋友去公園同戶外地方玩，周六、日九龍仔公園一帶都搵唔到位泊車，前日就連赤柱都冇晒位泊。香港人一向都冇有怕，但呢二、三十年都冇試過出現咁可怕嘅傳染病，所以一時不知所措，加上遇上一個乜都要反覆研究嘅慢郎中，想唔死都唔得，官府中人已經放晒風，呢單嘢有排搞，重有人會中招，重有人會犧牲，大家要有心理準備。
傳真︰2623-9278
電郵︰