我求大俠睇波都算耐，見過唔少龍門喺球隊落後下助攻，不過，好似前日拜仁龍門簡尼咁搞笑，就真係第一次見。
喺上個星期六拜仁慕尼黑主場對雲達不來梅嘅德甲聯，當時拜仁落後○比一而比賽有幾分鐘就完場，咁簡尼就突然間上前助攻；最搞笑嘅係佢助攻唔成之後，就點都唔肯回防，由得隊友裝越位，自己就重留喺對方禁區，當隊友大腳傳中時，佢重想伸出雙手去接波㖭！喺佢咁騎呢助攻下，拜仁梗係追唔番，結果輸○比一。
呢位「猩猩鋼門」之前接受電視台訪問時，佢竟然話自己寫足球自傳就太後生，但係可以寫慕尼黑夜店指南喎！唔通呢個堂堂德國國家隊隊長因為受桃色緋聞影響，搞到黐咗線？
前晚場米蘭打吡兩隊都踢得唔算好，不過最令我求大俠睇唔過眼嘅，係國米唔止輸波，重連風度都輸埋。佢哋成場波都踢到飛沙劈石，有前鋒韋利起踭打爆AC米蘭後衞馬甸尼鼻骨、馬達拉斯踏舒夫真高肋骨，而後衞哥度巴最後重做埋紅牌阿姑。不過，最慘嘅都可以話係下半場中段被換出嘅沙真奴，佢名副其實咁俾人踢到喊住離場。
一代鋼門舒米高宣布，話自己嘅身體頂唔住，所以喺季尾退休。其實，睇今屆表現，三十九歲嘅舒米高重可以再踢一屆；有口痕友就話佢見到曼城咁不濟嘅後防，真係早退休早着，唔通下屆重留喺度睇住曼城降班，整臭自己個名咩？不過，好彩舒米高個又係打龍門嘅仔加斯柏已經簽咗曼城，或者大家遲啲可以睇到加斯柏嘅風采呢！
查爾頓前晚再輸一場，佢哋領隊古比士利就話，就算最後未能爭得直接參加歐洲賽資格，都唔會考慮踢圖圖盃，寧願畀班球員放吓長假，當係答謝佢哋今季嘅努力。我求大俠都贊成古比士利咁樣做，若果查爾頓真係踢圖圖盃嘅話，來季唔夠耐力打聯賽，隨時成為護級分子，甚至降班㖭，今季富咸就係好例子啦！
紐卡素前晚英超慘敗喺曼聯腳下，後衞班納賽後話自己原本喺法國時踢中場或前鋒，估唔到去到英超變咗後防球員，即係暗示領隊卜比笠臣搞到佢咁尷尬；但係我求大俠相信，睇過場波嘅球迷會發現，紐卡素後防草木皆兵主因係中路巴布爾唔掂，班納咁講即係同巴布爾劃清界線，大敗唔關佢事咁話。