上星期日寫Depression，一位相熟醫生打電話嚟，指左丁山話「心病還須心藥醫」，乃門外漢之言。佢自己年輕時曾患上抑鬱症，經常唔快樂，自覺有「死咗好過」嘅傾向，好彩家人支持，細佬跟到實，再加上搵到好醫生，食啱藥，慢慢就好番，𠵱家冇晒事，打得食得，屬樂天一族。
呢位醫生確實係好堅強之人，與左丁山傾偈，嘻嘻哈哈，竟會唔知道乜嘢叫做抑鬱，佢寸左丁山話：「睇精神病唔好迷信名氣，世界不斷進步，醫藥不斷進步，追唔上時代嘅人，根本唔知道最近十年有乜嘢新方法、新藥物去治療抑鬱症。」嚡，佢係醫生就知道啫，普通病人根本分唔出乜嘢係舊藥、乜嘢係新藥，怎麼知道出名醫生竟會係過氣舊電池！
醫生話：「你買車都會試三、四架啦，睇專科醫生點解唔可以睇多兩三個，攞多啲意見，或者私底下問吓行內人嘅資料？」唓，又係多餘，一來我未必識得幾個醫生，二來醫生多數係同門師兄弟，甚至係老師，未必肯講太過率直坦白嘅說話，點查呀？醫生冇左丁山符，只好講：「你以後問我！」唉吔，自己有幸識得唔少醫生，有啲辦法，但係普通市民對醫生知識不足，都唔知去問邊個，買債券就講究信貸評級一目瞭然，可惜買專科醫生服務，多數會睇名氣，以為越貴越好！咁就出咗錯都唔知！