近排SARS令港人聞之色變，上班一族既然唔可以留在家中避炎的話，惟有加強個人衞生去面對；就正如亞Mark咁，SARS肆虐香港個多月都係如常工作，只係口罩不離身同埋勤啲去洗手囉！然而，有部份公司或大機構，卻採用非常手法去對應噃！就好似大昌集團旗下嘅合群汽車咁，原本總寫字樓設響太子區，但高層為防SARS會影響職員日常工作，上周三佢哋突然將部份員工調往其他Showroom駐守，話以免有人中招會令整個部門工作停頓喎！睇落佢哋好替員工着想噃！之不過要開會就慘喇！事關要長途跋涉返公司嘛！唔知呢個非常手法，會否擴展至同集團其他代理身上呢？唔係喇！亞Mark都要同我哋四眼編輯講聲，話少啲返公司見面，有事就以電話同E-mail互通，事關香港嘅優勢係資訊網絡發達又全面嘛！最後，亞Mark再一次代表我哋車版同人，向全港前線醫護人員致敬，佢哋嗰份堅持而無私嘅工作態度，實在值得現今港人借鏡㗎！