奇怪？一直以為只有特區政府才有IQ爆棚的天才高官，怎知道原來馬來西亞政府也暗藏高手，失敬失敬。
為了保護國民身體健康與控制疫情擴散，馬來西亞政府制定了一些特別措施，這點容易明白，但總可以有一個好一點的說法吧？即時取消香港居民免簽證入馬來西亞境，但馬來西亞駐港領事館又暫不接受辦理簽證手續，何必兜來兜去做咁多無謂嘢，乾脆講句：「香港人，咪入嚟！」咪重乾脆利落？
為了保家衞國都重有得傾，但如果係趁混亂博大霧，以為有機可乘打落水狗則勢係假，嗰班咁嘅瑞士佬，打香港鐘錶商番轉頭基本上係一個經濟決定，冇生意做，賺少個錢固然令人激氣，但俾人借題發揮，蝦到上心口就更谷氣。好耐冇見兼好似好多嘢都已經唔關佢事嘅曾司長話對此事好關注，唐高官則話會出面交涉，唔係話睇你唔起，但實在係應該由較高層次嘅人出面，例如董特首。若然董特首驚住唔夠籌碼，應該向北大人借籌碼，例如考慮禁止瑞士鐘錶輸入中國，或者徵收懲罰性關稅，如果呢兩點都做唔到，咁就不如由民間發起罷買瑞士貨，睇吓啲勞力士賣畀邊個？
香港人最憎俾人蝦，希望高官們亦唔好令我哋俾人蝦。