王敏德一家五口昨日到西貢為聲寶牌電視機拍攝平面廣告，這次他們寓搵真銀於家庭樂，一百萬酬勞便袋袋平安，有關方面更送了一部三十七吋大電視給王敏德一家。不過王敏德表示，他一收到廣告酬勞，便立即全部交給太太處理，事關他認為自己並不懂得理財。
王敏德一家五口昨日到西貢拍攝聲寶牌最新三十七吋電視機平面廣告，這是他們首次全家出動搵真銀，王敏德說：「呢個四月都唔開心，除咗有非典型肺炎，以前同我合作過拍《里情》嘅一個演員又過咗身，今日算係最開心，個市咁差，可以有機會一家人一齊搵真銀。」
王敏德一家人拍這個電視機廣告，除可獲得一百萬酬勞外，聲寶方面更送出價值五萬三千八百元的三十七吋大電視給他們一家享用。
王敏德昨日說：「呢部新電視會擺喺客廳，最好佢哋送多部三十吋嘅畀我哋放喺房啦，啲仔女知道有新電視都唔知幾開心，我重嗱嗱聲買咗大批DVD，橫掂非典型肺炎唔適宜出街，就索性喺屋企開二十四小時DVD派對啦。」
王敏德透露因非典型肺炎關係，子女都要停課，他閒時便會帶子女行山呼吸新鮮空氣，他說：「我𠵱家教啲仔女，一返屋企就要即刻轉右去厠所，我重好勤力幫啲仔女清洗玩具同消毒㖭。」
記者問王敏德這次拍廣告收入豐厚，會如何獎勵自己？他說：「啱啱聲寶嗰邊啲人畀張支票（酬勞）我，我只係掂一掂個信封啫，唔夠一秒已經過咗老婆手啦，我唔叻理財，錢銀嘅嘢都係太太話晒事。」
採訪:林妙萍 攝影:仇志德