無論係唔係你杯茶都好，妖妖哋嘅型男歌手Gackt，佢嘅灰色隱形眼鏡、深色眼影同紅唇雪肌，已經成為招攬大批fans嘅生招牌。雖然Gackt好有音樂才華，但係佢最新推出嘅寫真集《Gackt你追尋的夢》，好賣過佢嘅碟多多聲，我羅拉都要左撲右撲先買到最後一本。
呢本寫真集嘅焦點，當然係Gackt同徐若瑄一輯眼神交流電壓過千watt嘅情侶纏綿照啦，不過據聞啲fans唔會大發醋意，因為感情生活好神秘嘅Gackt，除咗未入行之前同前妻嘅花邊新聞之外，咁多年嚟同女人簡直係絕緣。早排傳聞Gackt同L'Arc~en~Ciel男主音兼電影拍檔HYDE關係曖昧，聽講兩個妖男臭味相投，加埋寫真集入面Gackt咀男結他手嘅照片，我羅拉反而認為HYDE同Gackt有可能啲喎。