最近逛荃灣發現新開咗一間雲南米線麵舖，一試之下不得了，不論湯頭、米線、餸料，都非常配搭得當，小記好唔客氣咁問大廚是否酒樓廚房紅褲仔出身，但答覆非常嚇人！紅就紅喇，不過係紅旗國企嘅中資銀行，而且重做到押滙部嘅九龍、新界區經理，不過更難得係佢由舊日揸筆管行政，到今日攞鑊鏟煮米線，佢都表現出一份敬業樂業，樂天知足嘅精神。
記者：朱崇德 攝影：周旭文
逢星期一至五刊出
俗語有話「拎得起、放得低」，葉先生由80年代初期開始就經歷過香港經濟最火紅嘅年代，最高職位重做過香港某中資銀行的押滙部九龍、新界區經理。阿葉話：「以中資銀行嚟講，呢個位已經可算係非常高，再升上去就可能要入董事局！」
金融風暴後，阿葉就嘗試走咗去做保險(94年)，但勢估唔到係噩夢嘅開始，緊接嘅係葉太同期間亦告失業，家庭財務馬上變得拮据起嚟！
當時阿葉手上有成兩座物業喺手，購入時樓價差唔多共值400萬，後來樓價跌咗一半有多，「原價290萬嘅單位好快就變成銀主盤出售；至於百餘萬嘅舊單位供得唔係好吃力，所以未有斷供……講真自己到𠵱家都唔係好想面對負資產呢個問題，但以粗略估計大概都重負緊百零萬！都算係比上不足比下有餘啦！」
「好在我呢個人性格，喜歡將負面事件正面睇！既然無咗份高薪厚祿，咁咪打多幾份散工頂數囉！」為咗餬口兼供樓，阿葉先後做過大廈保安、裝修師傅、工廠裝配員、送外賣、外滙員、報紙檔，不過講到最印象深刻，都算係喺紅磡開報紙檔，「當時希望手上有班長期客，兼做送報紙服務，朝朝由紅磡派到落九龍城，連10號風球都風雨不改！不過最後都係因生意一般，只好結業！」
轉行做樓面後，因做事認真，俾老闆賞識試做廚房，以至親往雲南學做米線，成為大師傅！「喺呢個經濟逆境嘅年頭，真係幾叻嘅人都死，因為實在睇唔通前景，不過人最緊要唔好太計較，肯學、肯試、肯做，所謂悲觀大前景，反而要做好啲，咁當你嘅前景出現時，你就可以把握機會，最終都會成功！」
電話：26120826
地址：荃灣沙咀道246號地下