非典型肺炎對經濟打擊嘅情況，愈來愈受到關注，問題未露曙光前，個市都會繼續濕滯。周末國泰航空（293）是否停飛惹來疑慮，公司發表聲明話情況嚴峻，但唔會停飛。
國泰股價好難有運行，𠵱家8.95元，同01年911後低位5.90元比較，重有好大距離，而𠵱家生意慘情同展望唔樂觀嘅程度，衰過當時。國泰冇Call輪上市，正股股價唔妥唔會拖累Call輪，亦冇Put輪得益。國泰事件，點都會影響大股東太古（A，019）、中信泰富（267）等。太A同中信Call輪，睇怕要向下插，太A與中信冇Put輪，冇得喺Put輪身上搵食。
國泰、太A同中信股價下跌，拖低恒指，影響人心，咪貪平買藍籌或恒指Call輪住，除非散得好厲害趁低博反彈。
恒指Put輪暫時仍有啲水位，可以吸納些少，搵三茶兩飯，向啲成交旺場嘅埋手，例如9587、9698、9751、9775、9806等。做炒賣，最好鋪鋪清，咪太耐。
滙豐（005）係近期比較硬淨嘅藍籌，但個市氣氛唔妥，硬淨股份最後都要回落，吼滙豐Put輪，大概可以有錢落袋，9578已屆末日，唔啱玩，可以選擇9616同9669。
章 盛