戴住口罩睇電影節，呼吸困難。但試過幾場，撞正咳到死死吓的鄰座觀眾，竟是自私的離罩一族，連會場供應的紙口罩也不肯用，愈想愈谷氣，休克兩秒鐘！為人為己，密封場所中，罩不離口，是指定動作。更何況帶病在身，感冒菌一樣會傳染呀。是以，很想在口罩寫警告標語，向冇罩咳嗽吐痰族抗議，叫他們跟老董一齊shutup。
話說回來，口罩寫標語搞裝飾，會影響防菌功能。3M出品，有幾種型號勁粉Q的，我藏起了捨不得用。試過在上面畫公仔，效果麻麻，有點似在白奶曬的衞生巾上搞花臣。假如表層改良過，口罩可以自由創作口號，天天新款，十八區各有特色，油尖旺跟屯門北一睇就知。市民從口罩設計中得悉對方是否來自高危區，應不應交往深入發展呢？睇罩心裏有數，最方便𠝹女族了。
口罩口號最多麻甩佬揀的，是「我口臭但我很溫柔」，豪放女子罩上寫「我是36D，你有8A嗎？」，「少講肺話」和「你食自己個橙，我食腦」夠中立，男女都鍾意。驚被點錯相的話，口號直接寫「我唔係楊永強！」玩驚嚇唔使跳樓，只要笠個「我是淘大曱甴！」口罩就得。離譜尚能接受，離罩就手尾長。特區此情此景，是我們過往口沒遮攔的報應，就當作罰繳掩口費吧。