非典型肺炎指數（SARSIndex）在高位反覆，以目前上升趨勢來看，過埋今個禮拜，香港將會成為SARS染病人數最多的地區，愈來愈多人信心下沉。SARS未能受到控制，一日繼續肆虐，香港經濟就泥足深陷，更難自拔。
唔係導人迷信，兩個月前，當時未有SARS，高人已經預言，話舊曆3月同4月係今年香港最差的月份，相信好多人（包括筆者在內）都以為係美伊之戰死得人多，衝擊全球股市大跌，冇人會諗到香港竟然發生疫症，百業蕭條，經濟受創程度之深，更甚於金融風暴。高人預言，不幸而言中。
SARS何時才會受控，冇人知道，有專家更認為會發展成風土病，對香港經濟影響，更為深遠。好在高人話最壞的時間只係舊曆3及4月呢兩個月，5月開始情況會有改善，下半年經濟更會重拾升軌。前景太多未知數，為求個心安、有個希望，但願高人下半部預測一樣咁靈。
金利來（533）02年度（12月年結）業績果然轉盈，上半年無疑係蝕1984萬元，但有一單撇帳成2942萬元，全年轉盈，唔單止金利來曾主席係咁諗，市場亦係咁樣預期也。
集團全年營業額5.2億元，升7.1%，獲利1043萬元，比前減少67.6%，每股盈利1.1仙，末期息2仙，連同中期1仙，全年一如預測的派3仙，往績PE雖高，但息率吸引。
中國大陸係金利來主要市場，去年營業額4.1億元，升9.6%，佔總營業額78.7%，其次為星馬及香港，分佔12%及8.8%。期內各主要收入來源，包括貨品銷售、投資物業的租金收入，以及版權收入皆錄得增長。位於內地金利來數碼網絡大廈的商務港項目已撇帳，並將場地出租，租約5年，去年商務港帶來的經營虧損達3655萬元，今後將有租金收益。
03年度，保守估計金利來盈利可大幅回升到5000萬元，每股盈利5.27仙，派息3.5仙，預測PE8.1倍，息率8.1厘。公司財況穩健，手持大量現金及無銀行負債，每股資產淨值1.96元，股價折讓高達78%！
郭兆誠