阿松偷步買車事件因非典型肺炎已淡化，無法再上報紙頭條，佢老頂董建華當然暗暗高興。不過，呢個世界唔係人人都好似阿松咁胡裏胡塗，做人處事係有個標準，有要求嘅。
立法會唔夠票成立專責委員會，相信亦唔夠票通過不信任動議。但係公道自在人心，大家都等緊老廉出手。但老廉阿頭李少光只向特首負責，難免又令人想起佢哋會唔會官官相衞。
特首辦都算好醒目，一聽到有啲咁嘅懷疑，第一時間白紙黑字答話，基於保密理由，唔講得廉政專員李少光同特首滙報咗乜嘢資料，但係老廉處理所有舉報時，都由審查貪污舉報諮詢委員會負責監察；如果委員會唔同意，李少光都唔可以自己終止任何調查。而查完之後，又會由律政司司長梁愛詩決定係咪提出檢控。最重要係委員會中嘅非官方成員中，包括立法會兩女將吳靄儀同余若薇，你估咁易講得掂佢哋咩？
傳真︰2623-9278
電郵︰