天安中國發展嘅上海天安中心，上個禮拜五搞咗個結構封頂儀式，大放金銀彩帶，配合舞獅彩炮助興，重熱鬧過過年。出席儀式嘅嘉賓，包括上海市副市長周太彤、天安中國執行董事黃清海、天安中國華東區總經理周正遊、上海市黃埔區副區長馮經明等。
天安中國係首批發展中國房地產嘅外資公司，上海係其中一個重點投資城市。天安中心屬甲級寫字樓項目，位處上海南京西路及新昌路，俯瞰人民廣場、市政府大樓、大劇院同博物館等標誌性建築物。物業樓高三十層，總建築面積逾五十二萬呎，五層商場近十三萬呎，寫字樓三十九萬呎，每層標準面積一萬七千呎。預期今年底竣工。
聽講天安中國正與部份投資者洽談出售整幢物業。
近排社會各階層聞「炎」色變，好多假期例牌節目可免則免，就連熱門嘅睇樓活動都少咗批捧場客，好多新盤大部份時間都靜蠅蠅，二手樓就更加死寂，加上政府啱啱公布中招市民的居住物業名稱，聽業內人士講，唔少客都明顯有避忌，雖未至於完全拒絕去名單上嘅物業睇樓，但有得揀都會避一避。
業主方面，有啲反應就似乎過敏咗啲，好似個別只出現一單感染個案嘅屋苑，就有激動業主建議，管理處完全禁止外來人士前往睇樓，尤其一啲發展商賣緊貨尾嘅現樓，佢哋話現時係高危時期，而且又唔係佢哋想賣樓，無理由畀咁多外人出入大廈。
樓市受到非典型肺炎打擊，今個月成交量唔慌多，大行已經開晒聲話要節流，包括削分行同減廣告費等。世紀21總經理鄧慶年同蘭西講，佢哋都會喺廣告費度動腦筋，但分行就唔單止冇減，重會多咗㖭。
鄧慶年透露，遲啲會有大約六家代理行加盟世紀21。六個加盟商都係得一間公司，唔似得舊年咁，部份有成四五間分行。佢話大行收縮業務，佢哋就加分行，可能最後同大行嘅分行數目拉近。
鄧慶年重話，呢啲都係地膽細行，客源夠，有時重做得好過大行㖭，就算市道唔好，因為皮費輕，支出多極有限，但大行就會好傷嘞。
與香港一關之隔嘅深圳，表面上未受肺災事件影響，經濟活動未受威脅，物業市道依然好景，好似羅湖區百仕達廣場三期，前周六日售出五十二個單位，發展商百仕達地產為慶祝復活節兼物業發展踏入第十年，早兩日搞咗個百仕達男人節，嚟緊嘅星期六同日重會搞復活節嘉年華會，有表演及遊戲節目，港客可到尖沙嘴新世界中心地庫嘅展銷服務中心，報名參加免費睇樓團，到時有專車接載到地盤。
前線嘅醫護人員每日努力與非典型肺炎搏鬥，精神可嘉，獲得各界嘅支持同關心。長實執行董事趙國雄噚日呼籲，除醫護人員，患病者都好需要大家關心，他說：「佢哋染病已經好不幸，千祈唔好歧視感染者。」
趙國雄話，旗下管理嘅大廈如果有感染者家屬居住，會特別關懷，例如佢哋唔方便外出，管理人員可以幫佢哋攞報紙，甚至收信。佢重呼籲，街坊巷里如果知道鄰居染病，外出時不妨睇吓佢哋有咩需要。