有「台灣龍嫂」之稱嘅整容藝人李庭，佢日前自稱租住過淘大花園D座，但自從E座有居民患咗非典型肺炎後，李庭就開始聯絡各大傳媒做訪問，噚日馮仁昭就喺德福花園商場見過佢。
李庭話自己逃離淘大後，就搬咗去德福，點知𠵱家又話德福有人中招。佢又話上星期發燒，但係前兩日先去睇醫生，話怕自己真係中招，遲知好過早知喎！講到好似就死咁。
點解馮仁昭咁都夠膽見佢？你估嫌命長咩，李庭個台灣經理人打過電話嚟話李庭冇事，一早由淘大搬咗去張國榮跳樓身亡嘅文華酒店。馮仁昭出到嚟，見到李庭喺德福商場嘅咖啡室起勢咁補粉，見到馮仁昭就送咗佢本整容書做見面禮，又送沙龍相，連佢俾醫生撩起個鼻窿隆鼻嘅相都有，認真唔開胃！
李庭噚日戴住兩個口罩，又攞晒消毒藥水出嚟搽，怕到唔戴口罩時要閉氣唔敢呼吸。馮仁昭話不如跟李庭返德福住嗰度，睇吓佢點消毒，佢又多番推搪，話約咗下一間報館做訪問喎，都唔知係唔係真！
黎姿同唐文龍噚日喺清水灣電視城拍攝無綫新劇《鳳舞香羅》。
雖然近日非典型肺炎肆虐，黎姿同唐文龍仍然要拍攝一場談情錫額頭嘅戲。黎姿話唔驚得咁多，而唐文龍事前就做晒預防工夫，除咗帶備火酒紙巾外，錫黎姿前重用漱口水漱口，總之就安全第一啦！
陳奕迅（Eason）日內出新碟，今次隻碟搵咗三位監製做歌，所以有三個唔同主題，連封面都出三個，分別用黑、白同灰做主色。首批重會限量每隻色出一萬貨，之後就只會出灰色。Eason所屬嘅英皇娛樂話相信黑色同白色會被搶購一空喎，而Eason下月三號會出席台灣嘅金曲獎，心情重好緊張㖭！
傅天穎（奀妹）自從同星皓解約後，就返咗台灣發展，佢早排重拍咗當地民視嘅偶像劇《濃情巧克力》，佢日前接受台灣傳媒訪問，自爆𠵱家同台灣一間連鎖百貨公司嘅高層拍拖，對方家勢顯赫，細奀妹一歲半。早幾日奀妹生日，佢男友帶佢去餐廳食飯外，重送咗隻鑽戒畀佢，然後好深情咁話如果佢哋結婚，最好可以生四個仔女喎，不過奀妹就話唔急住結婚。
古天樂日前同應采兒去咗內地，佢噚日喺上海宣傳完電影《失憶𠝹女王》後返港，見到古仔喺機場戴住口罩，做足預防肺炎措施，不過古仔話：「上海啲人反而冇戴口罩，我出入境時都係正常過關，冇乜特別手續喎。」
