肺炎繼續在香港肆虐，真係唔知幾時先至搞得掂，諗起去經紀行炒股都要戴口罩，確實會減低投資意欲，希望各位專家快啲發明醫好肺炎嘅藥，到時一定有商人銀行幫佢搞上市集資。
講起由外資大行保薦上市，經紀黃就提起中國外運（598），隻股之前跌穿2.19元招股價。不過，有外資證券行出報告，話佢明日公布嘅全年業績會唔錯，相信短期有機會造好啲，重上水面。
中外運早排受大市拖累，股價低見1.93元，近排股價好番啲，上周五升4.8%，收2.175元，但仍然低於招股價。
隻股上市之初，由兩三個大型基金坐咗大部份貨。半新股初次公布業績通常唔太差，加上據聞阿爺方面好關心股價表現，故此有望今次借業績炒一轉。
另外，以裕元（551）為首多隻鞋股，近排股價企得好硬，好似港台集團（645）咁，上周五升9%，收0.73元。小初見有外資大行買入，所以望多兩眼。
慕容小初