一場非典型肺炎將成個香港打亂晒，好多機構都要應變，以免一旦有員工中招，唔會成間公司癱瘓。八方最近同香港電台中人傾開呢個話題，佢話港台定過抬油，皆因佢哋有三棟分開嘅大廈。
八方一直都知港台喺廣播道嘅廣播大廈同電視大廈有一街之隔，不過就唔知有第三棟大廈，原來喺亞視隔籬重有棟教育電視大廈。據港台人士講，佢哋已經安排一部份外出採訪嘅記者長駐金鐘，又預備定如果其中一棟大廈有感染個案，就即刻將所有員工同錄音工作搬晒去另外兩棟。
唔好以為同行如敵國，喺呢個非常時期，港台商台罕有地放下分歧；八方聽聞，商台都睇中咗港台進可攻退可守嘅地利，商討緊一旦商台都中招，可唔可以搬埋入港台嘅空置辦公室，初步嚟講港台方面問題不大，話最多大家迫啲囉。
傳真︰2623-9278
電郵︰