可能見非典型肺炎疫情嚴重，連律政司司長梁愛詩都要撈過界幫埋口，叫大家注意個人衞生。噚日佢出席基本法頒布十三周年研討會，致辭結束時詩姐姐話鋒一轉，主動提起政府喺電視日播夜播嘅宣傳口號：「少握手、勤洗手、勿多手」。
咪話詩姐姐過慮，因為噚日研討會座上客，其中一位係特地來港參與活動嘅廣州中山大學陳廣漢教授。在座有記者即刻好敏感，聯想起另一位廣州中山大學醫學院嘅劉教授，即係曾入住京華酒店九樓嘅非典型肺炎源頭。
雖然此教授不同彼教授，但呢位陳教授一開腔就提到SARS，話廣州同香港都係重災區，不過廣州好少人戴口罩，搞到佢一落嚟香港，見到人人如臨大敵、口罩不離身，都嚇一跳，但都有「入鄉隨俗」跟住戴。陳教授後來向八方承認，內地傳媒不及香港記者咁落力報道SARS，至於箇中原因，大家心領神會，不必陳教授講到出面矣。
詩姐姐噚日提早離場，無機會同呢位中山大學教授碰面握手，唔使擔心佢會變成高危一族。不過大會主持則不理詩姐姐忠告，同呢位廣州教授有「肌膚之親」握手合照。好在陳教授話，佢所在嘅中山大學辦公室同醫學院距離好遠，染病風險好低。
傳真︰2623-9278
電郵︰