應采兒在台灣出生，四歲跟父母到美國紐約定居，其父一直在當地經商，故家境不俗。應采兒是家中獨女，但來港發展每個月只有萬多元包薪，故此只能在尖沙嘴租住一個面積很小的單位，她說：「工作唔多，所以收入唔係好多，又要自己交租，我又唔想伸手問屋企人攞錢，所以我好慳。𠵱家拍多咗戲，咁收入就比以前多啲，所以我就搬咗去另外一個較大嘅單位。」
應采兒續說：「喺香港一個人住，初時因為冇乜朋友都幾悶，後來識多咗朋友，工作又多咗，慢慢我就開始適應香港嘅生活。不過最近知名度高咗，啲朋友反而唔肯約我去街，特別係啲男性朋友，佢哋話好抗拒同我一齊會俾記者影相，然後無端端惹緋聞。」
在美國長大的應采兒，對愛情的態度是希望拍拖可以光明正大，她說：「如果搵到個幾穩定嘅對象，我唔介意公開，其實我嚟香港之前都有個喺美國嘅男朋友，但因為長期分隔，最終都分咗手。我搵對象唔係向錢看，所以我絕對唔會為錢同唔鍾意嘅男人上床。可以嘅話，我都唔想同呢行嘅男仔發展感情，因為呢行嘅男仔有太多引誘，畀唔到安全感我。」
應采兒與最容易跟合作女星傳緋聞的古天樂先後拍了《絕世好B》、《嚦咕嚦咕新年財》、《失憶𠝹女王》和正在拍攝中的《豪情》，但兩人一直沒有緋聞傳出，應采兒解釋說：「同古仔拍咁多部戲，佢好少會主動同我傾偈，其實我係一個好鍾意講嘢嘅人，有時佢話見到我就頭痛，因為佢好怕嘈。記得有次記者喺現場探班，佢重叫我唔好企咁埋，話唔想俾記者亂咁寫，所以我同佢點會有緋聞。」