個市唔夠生意，好多人以為最慘嘅人肯定係班卜架，皆因佢哋無底薪，加上收佣金嘅關係，啲風險重要自己孭番晒。不過，原來入機嘅交易員重慘，如果佢哋做錯嘢，所涉及嘅都同錢銀有關，喺啲咁差嘅環境下，好多人寧願自己「骨」聲吞咗去都唔敢報數畀老闆知，真係有苦自己知。
好似上個星期五，有個行家話畀伏勝知，佢公司有個交易員唔知係唔係未瞓醒，明明收到個盤要用兩毫子沽8萬股成功控股（288），點知佢喺入機嘅時候就入咗兩個仙沽8萬股，結果俾街外人眼明手快攞咗，個交易員先知做錯盤，結果迫住喺市場補飛。
不過最慘係隻股仔無乜街貨，而且喺一單交易拖低咗8成幾下，更加無人肯沽貨出嚟。個客知道單嘢後就火都嚟埋，話唔理咁多一定要當佢喺兩毫子沽到。聽講單嘢雖然最後都搞掂咗，但係個交易員就要自己攞成萬銀出嚟補鑊，伏勝覺得佢都幾慘。
之前曾借同深業物流合作而炒過一轉嘅意科控股（943），有傳聞話意科同深業物流原本喺公布咗合作後，會有個大型酒會，但唔好彩遇啱肺炎，為咗唔想兩地政府官員成為傳媒追訪目標，於是取消咗。
隻股喺落番去兩毫半後，似乎已經企得幾穩陣，雖然成交唔係好多，不過喺個市跌咁多日後仍然企得穩，都算唔錯。點解隻股喺啲咁差嘅環境下都可以企得咁好？聽聞係就快又有好嘢爆有關，有行家話佢哋開檔之後，已經接咗第一單生意，好似重幾大吓㖭，朋友叫伏勝不妨喺呢啲水位撈番啲，博佢彈番上去3毫子。
伏勝