章小蕙口中的新男友終於曝光，被她形容為「太陽先生」的Mr.Wilhelm，早前更曾與伊人結伴出席電影《捉智雙雄》首映禮。章小蕙昨日出席活動時，提起男友甜絲絲，她表示堅拒與在外地工作的男友以視像電話談心，因為不想半夜起牀化妝。
章小蕙口中常提及的新男友身份終於曝光，昨日有報道指她的新歡是奧地利人，身高六呎二吋，章小蕙形容對方為「太陽先生」，因為男友性格樂天開朗。
章小蕙更表示最危險的地方往往是最安全的地方，所以兩人一月底更結伴出席電影《捉智雙雄》首映禮，由於當晚兩人表現低調，一先一後入場，故未被傳媒發覺。
昨日章小蕙往銅鑼灣崇光百貨特賣場出席活動時，提起男友便笑不攏嘴，表現甜絲絲。她甫見記者即說：「我要澄清，份報紙串錯咗佢個名，正確串法係Wilhelm。」
問章小蕙拍拖多久，如何認識？她甜絲絲說：「我哋喺飛機上認識，識咗三個月，拍咗拖三個月，我覺得佢嘅優點多到數唔晒，佢浪漫、善良、思想又正直、光明磊落、胸襟廣闊。」
章小蕙續說：「Wilhelm嘅家人住喺奧地利，佢自己就喺香港住，但係佢嘅工作要成日飛，我哋多數都係靠電話維繫感情。通常一日通幾次電話，佢讀經濟學嘅，好叻計數，重教我用短訊，慳番啲電話費㖭。」問章小蕙男友Wilhelm從事甚麼行業？她說：「好冷門㗎，未經佢同意，我唔想講出嚟。」
問章小蕙兩人有否試過用視像電話談情？章小蕙笑說：「咁又冇，我唔想半夜起身化妝呀。」問她何時帶男友出來介紹給大家認識，她說：「遲啲先啦。」
章小蕙表示今次首次與外籍人士拍拖，她說：「認識佢可以話係緣份，因為我喺飛機上從來唔會同陌生人搭訕，但係嗰次佢坐我隔籬，我用完飛機上嘅衞星電話，唔識關機，佢示範畀我睇，跟住我哋又咁『蹺』搭同一班機返，可能佢係上天賜畀我嘅禮物。」
章小蕙又表示其子女雖未見過Wilhelm，但曾通電話。她大歎近期生意額跌幅達九成，問她工作如此辛苦，何不考慮與Wilhelm結婚，她笑說？「我同佢唔講呢啲嘅。」
採訪、攝影：ChenMuiHeung
