收到好幾封讀者來信講「沙士」，意見各有不同。
兩封比較趣致，一封問：「何志平局長求到嘅下籤，籤文如何，有冇解救？」籤文暫時搵唔到，至於如何解救，要請教高人咯。一位問：「不如請阿桂姐卜卦，睇吓肺炎潮何時可解？」讀者既有此一問，阿桂姐日日睇住「GG細語」，請阿姐決定是否卜卦。
一位Mingles讀者傳來一封長電郵，講述佢對威爾斯親王醫院嘅觀感。Mingles話網上有一個非官方網址
呢位讀者話佢爸爸七十歲，二月十七日入威院（傷風感冒，呼吸困難），三月七日下午突然昏迷，送入深切治療部，三月十一日「沙士」在威院開始爆發，三月十五日轉送仁濟醫院，亦受肯定唔係患上非典型肺炎。老人家喺三月二十五日離開醫院，回復過往狀態。讀者話佢當時（二月開始）進出威院，已戴口罩，冇染過病毒，所以小心駛得萬年船，千萬要注意個人衞生。
讀者說：「對於威院的安排，我誠心的感謝，由始至終醫護人員都好努力幫助病人，決定相當明智，希望大家千萬不要怪責醫護人士，他們是非常盡力的為市民服務！」Mingles來信當然係想為前線醫護人員打氣，雅虎香港請著名畫家阿蟲設計E-card收集網民簽名，送贈42間醫院員工，有意者請上雅虎。