五十七歲的何桂萍修女，脫下莊嚴神聖的修女袍，帶着愛與笑容走進社區服務人群。阿Ho近年全身投入非牟利慈善機構「關愛之家」，致力為無助少女提供暫住和輔導服務，並積極協助改善女童與家人的關係；她坦言，接觸家長時碰釘的情況很多，但卻從不氣餒，只會抱着順其自然的豁達態度面對。就在這份「做得幾多得幾多」信念下，短短三年內已令超過八十名女童得到幫助。
早已習慣被人暱稱「阿Ho」的何修女，經常面帶笑容，予人和藹可親的感覺。她不諱言，在「關愛之家」的輔導服務中曾有捱罵的體驗，「我哋唔單只幫助女童，重會reachout（家訪）接觸女童啲家人，希望改善兩者嘅溝通同相處問題。當中有家長很合作，願意逐漸唔再打、鬧孩子，亦有家長採取拒絕態度。我接觸過一位母親，佢不斷鬧個女，跟住鬧我，當時我望住佢心諗：『我明白點解你個女咁難受喇！』我哋冇辦法改變呢位母親，反而成功令囡囡接納同容忍佢母親，然後透過向我哋傾訴紓發情緒。」
成功的個案又豈此一宗，阿Ho舉例：「有個女仔不嬲好鍾意玩，但𠵱家佢玩到夜晚十點就走，因為佢記得答應過家人十點半要返到屋企。有好多女仔經過輔導之後，少咗同阿媽嗌交。大部份成功例子，係啲女童學業成績好咗，人際關係有改善。」
阿Ho指出，家庭背景對個人的成長和發展構成很大影響，不少女孩因父母離異或其他家庭因素，引致情緒問題，影響其性格發展，包括變得自卑、有自毀傾向、對人缺乏信任等。何Ho說，因此，「關愛之家」着重以愛心幫助每一位女孩，「出面一個社工對起碼十個求助人，我哋就可以人盯人咁提供個人輔導。另外透過舉辦興趣班、成長發展訓練課程、歷奇體驗活動，幫助家舍女童重建自信，發揮潛能。」
面對社會問題日益嚴重，少女的抗逆能力較弱，直接影響輔導服務的成效，阿Ho卻能保持樂觀心境，「我發覺成長期少女好creative（富創意），改變同適應能力好強。我服務嘅理念，係喺女童跌倒嘅時候伸手扶對方一把，讓佢繼續上路。我亦學會尊重女童嘅選擇，唔可以勉強佢哋受助。所以，我只覺得感恩嘅心愈嚟愈大。」健談的她由衷表示。
熱愛工作的阿Ho，亦樂於與記者分享其個人成長經歷，「我十三歲喪母，自此要幫手湊大六個細佬細妹，覺得生活得個『忙』字，人生觀幾悲。當年我見有修女喺街度派麵粉，自然走去排隊攞，後尾一直得到教會、好多朋友嘅溫暖支持，令我長大後立志回報社會，幫番有困難嘅人。」
「關愛之家」由一群跨宗教及專業人士於九八年創立，為年屆十四至十八歲，身心受創或無法與家人共處的少女提供暫住居所，提供專業輔導。服務對象主要由社會福利署及學校社工轉介。鑑於資源有限，家舍在同一時期只能容納十名女童入住，各人住宿不超過一年。歡迎善長捐款，以開展更多活動。
捐款編號：C0899
暖流熱線
電話:29908688
傳真:23702192
電郵:
網址：