籮霸珍妮花洛庇絲（JenniferLopez），好耐之前已經開聲話想拍經典電影《辣身舞》嘅續集，可惜呢套戲嘅主角最終俾一個二打六女演員搶咗嚟做。
不過籮霸原來由頭到尾都冇打消過重演八十年代跳舞片嘅念頭，最近佢個新MV《I'mGlad》，就擺明老翻八三年套《勁舞》，總算係了咗佢嘅心願。
籮霸嘅新細碟《I'mGlad》個MV，搵咗鬼才攝影大師DavidLaChapelle執導，有猛人助陣，本來大可以拍個新奇刺激兼而有之嘅傑作出嚟，但係籮霸喺個MV入面嘅衣着打扮甚至舞步，根本就係全面老翻《勁舞》。好似《勁舞》女主角珍妮花貝斯（JenniferBeals）嘅爆炸頭、跌膊衫加legwarmers打扮，籮霸全部抄到十足十。其中籮霸喺MV入面一場香汗淋漓嘅練舞片段，同《勁舞》完全冇分別，就差在個女主角唔同咗樣啫！
查實籮霸當初係舞蹈藝員出身，佢喺九十年代出道之初，重曾經為珍納積遜（JanetJackson）伴舞，做過人肉布景板，難怪佢對呢啲舞蹈員故事咁鍾情啦！