阿仙奴領隊雲格不愧係善於出口術嘅老狐狸，明明隊波準備響今日足總盃對錫菲聯，重有閒情話睇好死敵曼聯可以響歐冠盃八強次回合砌低皇馬出線。
無他嘅，阿仙奴禮拜三就同曼聯響聯賽進行生死戰，佢當然想講啲嘢轉移吓曼聯視線，加重死敵嘅後顧壓力，呢招都算幾高明。
雲格話皇馬鋒力好強，但後防就極之水皮，所以相信曼聯響奧脫福可以入好多波喎。查實雲格應該顧掂自己先，因為佢哋今日嘅對手錫菲聯都唔係善男信女。
曾經踢過錫菲聯嘅前威爾斯國腳桑達斯就同班錫菲聯嘅球員獻計，話想贏兵工廠就一定要踢茅波。如果錫菲聯言聽計從，呢場波就有嘢睇咯。
AC米蘭中場施多夫因為膝傷今季提早玩完。有消息話佢因為所託非人所致，畀個醫生搞到傷勢惡化，而個醫生就係當年醫壞尹巴斯頓膝頭嗰位。我求大俠聽完就好懷疑：第一，佢當年醫衰尹巴斯頓，冇理由AC重信佢；第二，水皮極都唔會醫一醫就搞到施多夫傷勢惡化啩？
拖連奴呢期都算衰到貼地，今日「主場」對皮亞琴察唔單止冇主場之利，重竟然有五件正選停賽。前鋒盧卡利尼賽前以領導者口脗呼籲班隊友振作，不過聽講呢位射手今季跌晒Watt，上場對祖記又因為發老脾俾人趕出場。我係佢隊友都唔聽佢知笛啦。
羅馬龍門比列斯素利日前大彈球會訓練方法不知所謂，搞到佢事業停滯不前，重話如果留效阿特蘭大，𠵱家應該穩坐意大利國家隊第三把交椅。查實呢個年輕人今季表現唔錯，搶咗前輩安東尼奧利個正選位，𠵱家講啲洩氣同埋影響軍心嘅說話，睇佢都係唔想留響羅馬定嘞。
德甲禾夫斯堡今季主場真係好厲害，十三場主場聯賽贏九場；不過佢哋今日對手漢諾威呢排都唔弱，上個禮拜就幾乎砌低拜仁慕尼黑。我求大俠提醒大家，漢諾威射手波碧響德甲累積九十九球，差一球就突破一百大關，不過就衰在隊波冇後勁。
連續六年喺季後賽首圈出局嘅木狼，今季打生打死都係為咗季後賽首圈嘅主場之利，𠵱家終於一償所願爭到個第四位，諗住今季晉級有望啦！點知好衰唔衰，撞正「三連霸」湖人最近愈打愈勁，眨吓眼就由第七位升咗上第五位，搞到木狼隨時喺第一圈就要硬碰湖人，真係黑到暈。睇怕加尼特今年又要提早執包袱放暑假囉！