香港有唔少車迷都喜愛四驅車，但大部份選購四驅車作座駕嘅車主，往往只愛款式，而未能真正領略到四驅車嘅實用及可靠之處；但今日《用車報告》主角Morris及其大哥古先生，就憑着一部越野路華RangeRover，而尋找到真正嘅四驅車駕駛樂趣。究竟佢哋有何體會，同埋對部車有何評價呢？大家不妨一齊嚟睇睇。
記者、攝影：郭信強
堪稱越野車界勞斯萊斯嘅越野路華RangeRover，雖然配備4.4公升V8引擎，以及5前速Steptronic半自動波嘅新一代型號已在港推出，但上一代型號仍廣受用家追捧，皆因佢設備齊全豪華之餘，無論On-road抑或係Off-road都有出色嘅表現，因而令不少車迷對其留有深刻印象呢！
引擎：4554ccV8SOHC
馬力：225ps/4750rpm
扭力：38.4kgm/3000rpm
尺碼：4713×1889×1817mm
軸距：2745mm
車重：2220kg
車價：$918,000（1997年）
然而，最令Morris記憶猶新係一次在深圳駕駛嘅經歷：「我記得嗰日啱啱遇着深圳排洪，有好多路面都有水浸情況，而眼前已有一部三菱Pajero於水浸嘅路面中死火，響寸步維艱嘅前提下，後來我睇過水深之後，就膽粗粗將車駛過水浸路面，當時水深已至車門把手，但竟然一滴水都無入過車廂兼可順利通過，自此之後我就知道RangeRover可擁有全天候嘅能耐。」
Morris同佢大哥都不約而同認為車廂空間好闊落，尤其係有良好嘅腳部空間，加上有升高降低嘅車身，可方便太太同小朋友上落車；安全方便，RangeRover本身穩紮嘅車架、底盤結構及多個安全氣袋配搭，都能夠為車上乘客帶來安全嘅乘車環境。「重有呀！我重好欣賞部車嗰套HDC系統㗎！事關佢響落斜嗰陣可以控制車速，從而令行車安全度提升不少㗎！」古先生搶着說。
「點解會揀越野路華RangeRover？其實因為響1997年嗰陣，我經常要往來中港兩地，加上國內路面環境太差，所以就諗住買部四驅車代步。不過喺買車之前，有唔少朋友都話揸大型四驅車會好難睇位，但試完車之後我就覺得RangeRover雖然身形龐大，不過睇位時比一般四驅車或MPV還要容易，揸起上嚟都覺得輕鬆啲，兼且重好啱喺國內一啲小路上行車㖭！亦因為咁，所以我咪揀咗佢囉！」Morris笑着說。
由於Morris揸車經常都滿載乘客，所以後來就改用一部MPV代步，並將呢部RangeRover讓畀大哥古先生駕駛：「不經不覺，我都已經揸咗呢部RangeRover有四年時間，部車畀到我嘅感覺係可靠同耐用，而且個樣重好Man㖭！」古先生說。
佢又表示，曾經與JimnyClub嘅會員到一啲山頭，一嘗Off-road嘅駕駛樂趣，開始時會擔心自己技術唔夠，而未能克服有關路段；但RangeRover強勁越野性能，就算部車沒有作出任何改裝，都仍能在山頭上走動自如，難怪Morris兩兄弟會對此車讚口不絕啦！
揸咗幾年RangeRover之後，古先生對四驅車亦有一定嘅感覺，亦曾經試駕同考慮購買其他品牌嘅四驅車，如平治M-Class及寶馬X5等等，但對RangeRover仍抱滿意態度。
「我曾試駕同廠嘅Freelander及Defender，但並未感好大興趣，因為我覺得Freelander動力唔係太夠，而且似一部房車多過似四驅車；Defender駕駛時會較辛苦，兼且感覺唔係咁適合香港路面，但勝在可以學到駕駛四驅車嘅技術。」古先生說。