非典型肺炎（SARS）蹂躪淘大花園後，話咁快去到牛頭角下邨，重過埋馬路，前日登陸德福花園，據報德福G、N、Q、T、U五座大樓皆有人中招。
德福有二十一幢樓，由A到U按字母排列，點解係呢五座中招，冇人知；但好事者就大叫好邪，因為將呢五個英文字母重排，就係「QTUNG」！係天降徵兆，抑或隻SARS有心整蠱？
更奇怪就係，政府高官噚日後嚟竟然改口話其實德福只有四座樓有事，N座嘅住客係由淘大搬嚟，應入淘大條數，唔算係德福喎。SARS變SRS都算，今次人命關天，唔係街市講價，難怪德福嘅業主委員會主席潘任惠珍火滾，當場踢爆政府官員嘅謬論，話「理得你呀，總之佢係德福發病，就應計入德福，五宗就係五宗，點可以因為怕QTUNG就減一個。」
呢位觀塘區議員果然敢言，潘太重話，德福有近五千住戶，同淘大又有緊密社區關係，都預咗有事，中五戶好少啫，最緊要將實情公開。佢話自己幫手送飯畀隔離者都唔怕，借埋幾十集《雍正皇朝》DVD畀佢哋睇亦冇所謂，但靠政府幫就死梗。真係患難見真情。隔離措施係為整個社區好，所以應該支持，但係連啲座數都玩，唉。其實德福有S座，好彩冇中招，唔係就連董氏內閣親信都Q埋。
傳真︰2623-9278
電郵︰