非典型肺炎指數（SARSIndex）前日回落到28人，噚日股市就唔再跌，恒指重有近20點進帳，不過市後公布數字又多番，真係有排煩。講番打擊SARS同經濟救亡嘅措施，其他地區真係快香港幾拍。好似飲食同旅遊業，直情係水浸眼眉，就快沒頂，但董特首煞有介事般出嚟噏咗幾句，大意係政府會有一連串紓解民困嘅措施，之後就冇咗下文，呢一類措施，議就決，決就行，真係唔明點解要諗咁耐，唔通等倒閉潮出現，千計食肆執笠之後先伸出援手乎！
地產股有反彈，跌咗咁多，在低位已見有支持，新地（016）最強勢，收35.9元，升0.6元。嘉里建設（683）早段已拒絕下跌，中午收市時已逆市而升，午後停牌，傳涉私有化。筆者周初收到料，話呢隻股票唔怕揸多少，可食大茶飯，估唔到咁快就應驗。
其實，𠵱家唔少股票都好抵買，有低PE又高息者，也有股價折讓得不合理者。就以嘉里為例，息口有5厘，每股資產淨值成18元，進可攻、退可守，真係好值得博。
隆成集團（1225）02年度（12月年結）業績倒退，下半年仍未能扭轉上半年的頹勢，全球經濟氣候疲弱，對隆成影響頗大。雖然包括中東戰事及經濟放緩的不明朗因素仍多，但集團繼續擴展生產設施，對前景仍審慎樂觀。
去年，隆成營業額10.2億元，減8.3%，獲利9313萬元，減12.1%，每股盈利12.89仙，末期息6仙，連同中期2仙，全年8仙，往績PE9.3倍，息率6.6厘。
集團主要設計及產銷嬰兒及學前產品，佔總營業額達8成的美國及歐洲兩個主要市場，去年營業額俱減少，而所有產品，包括嬰兒車、嬰兒床及軟類製品的銷售全部下跌。
不過，集團透過成本控制，增加在內地採購原材料，令毛利率由29.3%提升到31.3%。同時，集團已打開中國大陸市場，在深圳開設一站式嬰兒用品店，生意理想，並已計劃在各大城市開設專賣店，增闢盈利來源。
03年度，估計隆成盈利可止跌回升，且有6厘以上息率，係穩健的收息對象。
郭兆誠