港股噚日窄幅上落，似乎大部份芬佬重係舉棋不定，想睇清楚肺炎潮發展形勢之後才決定追沽揸。恒指收報8645，升19點，成交金額69.7億元。
噚日最奇怪係國泰（293），大減航班37%兼發盈利警告，但股價依然企硬，雖然跌過落8.70元，但最後以8.95元平收，完全係一個非典型走勢。
唔好話阿虎唔提出警告，國泰可能會進一步削減航班，減幅合共超過50%亦唔出奇，如果今年唔使蝕就真係算佢叻。
近期地產股股價大跌，市場傳出唔少大股東出手增持，嘉里建設（683）索性停牌話搞私有化。其實之前恒地（012）亦有意將恒發（097）私有化，但就唔成功。市場又傳出恒隆系將格蘭私有化後，重想連恒隆地產（101）亦私有化，但傳聞被否認。唔通地產股真係跌過龍？
近年地產股已甚少透過證券市場集資，唔少投資者長期睇淡地產股，好多地產股嘅股價遠低於資產淨值，加上地產公司大股東手上資金亦冇出路，維持上市地位要一定成本，因此現時雖然多地產公司搞私有化，但並非大股東對地產前景好有信心。
錦興集團（275）自從併股後股價不斷下跌，噚日終於出現似樣的反彈，升幅達20.6%，收報0.38元，成交雖然少，但總算有人願意入市Mark番個價上去。Cookie同阿虎講，錦興上次40合1併股，無非想為配股集資鋪路，幕後人自然唔會畀股價無止境下滑，現時股價出現反彈，可能係快有行動。不過，就算股價上唔到，錦興可能會發可換股債券，甚至供股。此股街貨唔多，股東又夠實力，下跌空間有限。
阿虎