這個多事之春，我忽然氣餒。想像有幾多人在情緒低落時，一個人包了文華酒店健身房做gym。在極度低落時，可以到酒店24樓迎住曼克頓plus超級豪華海景跳樓自殺……樓下供應55元一杯咖啡，我肉都赤死，唔捨得，莫講話包場跳樓。我承認，我是眼紅別人得到上天100%寵幸，而其他夾縫中求存的族群，隔文華酒店成個海的舊區區民，出入卻受盡白眼。淘大花園二百多個感染個案，影響近百住戶，他們的身家加埋都冇三億。對面牛頭角下邨大部份是老弱戶，萬一染病，敢寫包單，絕對沒有名醫滙診，過世後更沒有明星哭喪似剛剛死老竇。我以前相信人心肉造，SARS一擴散，這個城市本來已經衰弱的70%肺功能更衰更弱，我感到呼吸困難。各階層自我防範的意識推到極限，彷彿做了眼科手術，一眼紅一眼白在天地不仁瘟疫爆發非常時期中，敵視對方。口罩背後，說穿了都係一人一啖氣，有人以為禁制別人唞氣，自己唞得大啖些，就會安全過關，中招的就不會是自己。
專家說偶像之死對社會有壞影響，擔心青年跟風。有冇搞歪？張少四字頭，只有我們這種尷尬老餅才會懦怯感觸。人到被後生仔叫收皮的中年，有銀冇銀，都咁難過；每天都像大腦插喉，心臟吊鹽水，情緒在ICU中危殆。