立法會審議二十三條嘅草案委員會主席葉國謙，為咗完成政府七月通過二十三條嘅心願，得咗個「開會神槍手」外號，乜都砰砰砰投票通過。點知原來呢種非典型文化，已經入侵內會。
內會噚日開會，馬逢國質疑上月底喺二十三條草案委員會遲咗散會，鄭家富之後「隨隨便便」宣布緊接嘅《防止兒童色情物品條例草案》委員會會議流會，鄭家富即反擊，話內務守則寫明十五分鐘唔夠人就要流會，唔係「隨隨便便」。
八方相信都好難三言兩語講清楚件事，但係主席周梁淑怡就希望盡快解決，交畀議事規則委員會再傾，結果李柱銘就因為周梁唔畀其他議員問問題，嬲到行去記者室坐，重好似講波咁喺度旁述。不過可能馬丁太勞氣，之後同記者再傾時，竟然將周梁淑怡講咗做葉劉淑儀都唔知。
（圖）周梁淑怡（右）噚日主持立法會內會，重激到馬丁走咗去記者室玩旁述。 韋志滿攝
傳真︰2623-9278
電郵︰