經紀陳向來特別多古靈精怪消息，但今次唔係推介拿手嘅二三線股，而係國企股，重要係連蝕3年，A股有機會被停牌嘅吉林化工（368），佢所持嘅理由好簡單，就係阿爺唔會睇住國企唔掂，好大機會重組。
吉化呢排股價在0.60至0.80元徘徊，久唔久見到有幾間中資證券行掛牌買賣，成交亦唔算差，噚日升6%，收0.70元。
經紀陳話，吉化A股其實波動過香港嘅H股好多，A股如果連續3年虧損要停牌，但H股就唔使。以往虧損國企重組例子多的是，所以佢相信吉化亦唔例外。
經紀陳又話，聽班大陸客講，市場傳聞吉化重組方案有幾款，包括注資重組、私有化，甚至賣盤都有。吉化今個月就會出業績，雖然公司話呢一季生意好轉，但斷估都冇能力扭轉乾坤，理論上，可以炒重組概念，但風險好高，所以只適合短炒。
慕容小初