拉素前晚喺足協盃作客波圖一比四大敗當然令人意外；但係比起波圖教練摩連奴補時階段，突然喺場邊捉住對方球員阻延比賽，最後俾球證趕出場，就一定冇咁經典。
話說摩連奴成場波都好冷靜克制，喜怒不形於色，好有大將風度，果然喺師傅卜比笠臣身上學到唔少嘢咁。點知去到補時階段，拉素喺前場有個界外球，卡斯度文執起個波，突然摩連奴粒聲唔出從後𢱑住佢，卡斯度文重立即轉身就推對方一下。老實講我求大俠都估唔到，竟然一個教練會咁樣做。
摩連奴之後俾球證趕出場，卡斯度文就領黃牌，不過摩連奴離場前好有禮貌咁同卡斯度文握番手，話晒佢已經達到阻延比賽嘅目標啦嘛。我求大俠就話，摩連奴真係衰收尾，卜比笠臣睇怕冇教你呢招啩，佢老人家睇見嘅話，真係可能笑甩棚牙都似。
正當韋斯咸喺英超聯護級前途最關鍵嘅時候，球會竟突然間下令要節省一千萬鎊（約一億二千萬港元）開支，基本上係向一班高薪球員開刀，領隊羅達都要減三成人工，而季中先加盟嘅保耶想繼續搵三萬五千鎊周薪都好難囉。我求大俠唔係球會班主都知喺呢個時刻減球員人工，肯定會打擊士氣；球員隨時會無心機踢，等於半放棄護級狀態，今日重要主場對維拉係有搶分機會一仗，真係唔明韋斯咸個班主點諗。
重未脫離降班漩渦嘅英超球隊列斯，可能今周迎戰熱刺時有額外嘅士氣支持，原因係佢哋官方網頁首頁，轉咗係支持球隊同領隊列特嘅設計，而且亦可以吸引多啲球迷入場，列斯官方網頁總舵手確係有諗頭。話時話，英甲下游球隊打吡郡就另一個世界，原因係佢哋領隊基哥利呢排停賽，要由佐治貝利頂住檔，佐治貝利話佢禮拜一就做完替工，今日唔知聽日事；不過本報名家蘋果波神估班波絕處逢生，一定有鬥志，今周作客打贏溫布頓喎。
邵佳一上個禮拜首次正選上陣，即協助慕尼黑1860取得七場德甲以來首場勝仗，腳頭果然好，而會方似乎亦諗到周四生日嘅佢會好旺，所以送咗架奧迪汽車畀佢當生日禮物之餘，今周作客比勒費爾德佢好有機會第二次踢正選。另外，聽聞佢已經同啲隊友好熟，早喺禮拜三就同隊友開咗生日會，因為德國比中國遲一日咁話喎，而且佢已經識咗五百個德語詞彙……我求大俠見到阿一仔咁爭氣真係喜上眉梢，希望佢可以繼續幫1860搶分啦！
波神佐敦一向行事都出人意表，睇佢之前屢次姣婆守唔到寡，話退休又唔退就知喇！前幾日波神重話冇咩興趣返公牛，點知轉下頭又話要諗多次，因為公牛係佢嘅第二選擇喎。不過我都明佐敦點解會回心轉意嘅，畢竟佢一世人最光輝嘅日子都係喺芝加哥度過，而且屋企又係嗰度；最重要係假如佢返公牛揸Fit，副手將會係舊隊友柏臣（JohnPaxson）同岩士唐（BJArmstrong），三個臭皮匠加埋，點都好過喺巫師孤身作戰啩！
逢周六、日見報