外國傳媒有時真係乜都選一餐，好似最近英國嘅《Chat》雜誌，就搞咗個「最性感阿婆」選舉，結果鍾歌蓮絲（JoanCollins）獲選為「最性感阿婆」，不過自詡青春無敵嘅佢，應該唔多願意攞呢個獎囉！
下個月就七十歲嘅鍾婆婆，當年主演嗰套人氣電視劇《豪門恩怨》，我羅拉嗰時重讀緊幼稚園都已經捧場，其實佢之所以咁得讀者歡心，皆因佢保養得好，幾十年如一日。另外，𠵱家六十三歲重不停四圍巡迴演唱嘅天娜端納（TinaTurner），今次都攞到亞軍，總算實至名歸！
至於啱啱宣布息影嘅伊莉莎伯泰萊（ElizabethTaylor），同埋處於半退休狀態嘅珍芳達（JaneFonda），都齊齊打入十大，佢兩個當年被喻為荷李活性感大美人，𠵱家都重有捧場客，真厲害。不過奇就奇在外號「鐵娘子」嘅前英國首相戴卓爾夫人，居然排行第九，連我羅拉都𢱑晒頭。