好多讀者來電郵講SARS，包括八卦、情報、自保貼士等等，非常多謝。上星期二、三講一位葉讀者嘅八卦，其實係「天風姤」，印出嚟變咗「天鳳姤」，一位蔡女士心水清，指出錯處，蔡女士話自己係岑逸飛學生，與胡慧中（何志平局長夫人）一同上個岑逸飛嘅課，要求與岑公聯絡。既然蔡女士有如此要求，將佢嘅電郵轉畀岑公便是。
另一位LawrancePau先生寄來一篇文章，以測字論時勢，內容太長，不便轉述，以佢嘅測算，美伊戰事在4月17日就大局已定，4月21日後，SARS就受控制，情況大大改善，大家唔使驚。但願如此，否則旅遊業、餐飲業破產關門者眾，幾萬人會失業。
餐廳羅來電郵，叫左丁山睇一個網頁mediaguardian.co.uk，專講廣告，內有一篇講香港旅遊發展局喺英國版雜誌Cosmopolitan、CondeNastTraveller賣廣告，主題係宣揚香港係旅行好去處。廣告稿係三月之前策劃好嘅，訂好晒版位，但香港發生SARS之後，要抽稿都抽唔切，令到《歐洲華爾街日報》都要問一問旅發局：「點解要出呢個廣告？」廣告我哋冇睇過，但廣告主題就係話旅客嚟到香港，會發覺香港太多嘢好玩好睇，直情takeyourbreathaway！唉吔，撞正SARS嘅症狀就係嚴重急促呼吸，用英文講takeyourbreathaway，非常貼切。如此一來，旅發局廣告就俾鬼子佬笑到面黃。話香港冇運喎，連賣廣告都撞大板，又真係慘情啲！