有見非典型肺炎繼續擴散，各行業都做定防炎措施，以免一旦有員工中招，搞到全部同事都要隔離，到時公司就唔知點收科。估唔到呢個措施幫到寫字樓租市。
中原工商舖（商業部）商業部區域營業董事何德成話，不少公司嘅措施有採用彈性上班時間，減少上下班途中中招機會。同時，有機構嘅電腦部員工，可以留喺屋企做嘢；或者係高層用多啲電話溝通，遙控業務。另外，有公司將辦公室分為兩組，安排喺唔同地區嘅寫字樓做嘢。聽講滙豐同中銀嘅後勤就分批喺中環總行，同大角嘴奧海城後勤總部做嘢。聽講BNP百富勤都有安排員工喺中環交易廣場同鰂魚涌太古坊返工。
何德成話，由於唔少公司都咁做，以防萬一，所以都要搵臨時辦公室，導致近期細單位兼3至6個月短期租約大增。有啲大業主計劃將單位間細，以短期租約方式出租，果然夠晒靈活變通。
原本買樓置業係開心嘅事，收樓入伙就更加喜上眉梢，點知肺炎搞到大家心情都唔太好，樓價又有跌無升，收樓又點會笑得出呢？
咁嘅環境，發展商就自然要諗計，刺激下市民置業情緒之餘，兼推動下個市啦。香港興業東涌藍天海岸就快收樓，發展及市務部總經理陳子明話已出緊收樓通知，所以趁勢搞個「新思維入伙喜悅分享計劃」。
即日開始到下個月十一號，只要業主推介親朋好友入市，就大家有着數。業主有八千到萬二銀入伙利是，買家都有利是，視乎你買嘅單位大細，利是由萬五到三萬銀，重有一萬到萬五蚊嘅家具禮劵，最多可得四萬五蚊，都算有睇頭。
若果你想買藍天海岸，但又唔識得屋苑嘅業主，唔使灰心，搵東涌居民同機場做嘢嘅朋友都得㗎。搵佢哋推介，佢哋都有六千到一萬蚊利是。若果再搵唔到推薦人，買家都會有一系列百貨公司、電器及家具等禮券，最多四萬五蚊。
𠵱家咁嘅氣氛，重有人敢入市掃貨，而且重係師奶，真係唔好睇小女性嘅購買力同膽識。中原地產海翠分行余國忠話，啱啱有兩個屯門區女業主，夾錢買咗三個單位嚟收租。
呢三個係兆禧苑C同D座單位，成交價三十八萬至四十七萬，總共一百二十五萬。租金回報都唔錯，有八厘幾九厘。聽講呢兩個師奶，專買內櫳質素較好嘅單位，唔使裝修就可以出租。原本佢哋同業主個價重有啲距離，點知近排個市突然大跌，啱啱好到價，立即成交。
證監會提出喺香港推出房地產投資信託基金（REITs），發展商似乎興趣唔大，但業界就話有得諗。美聯物業首席分析師劉嘉輝話，𠵱家世界各地嘅房地產投資信託基金，提供嘅平均回報係七厘，所以香港嘅回報率唔可以少過呢個數。
佢指出，近年物業價格下跌，商場租金回報約有七厘，估計商場同優質寫字樓，會較易成為基金收購對象。
當然，收購價一定要比市價低，先可以收到七厘或以上嘅回報。
不過，地產商一般唔會將手上嘅物業降價出售，劉嘉輝估計，基金會轉為吸納單幢物業，或者係部份業權分散嘅全幢物業。
防炎已經變成全港市民最齊心做嘅事，新地屬下兩間管業公司啟勝同康業，為管理嘅二百幾幢住宅做防炎措施，涉及業戶二十萬。
啟勝每戶送有消毒同殺菌效用嘅消毒氯丸，據講可以足夠用一個月，等住戶自己放入廁所水箱，或者溝水倒喺啲去水位，達到防炎效果。而康業就將消毒藥丸放入大廈嘅沖廁缸內，重會入屋倒漂白水落去水位。
交樓方面，新地加入一系列嘅防炎措施，總之就係盡量防止非典型肺炎喺旗下屋苑出現。
蘭西
電郵地址：
