據聞生產液晶體顯示器嘅廠家近排好掂，其中有份做呢門生意嘅信利國際（732），將於今日公布全年業績，但小初擔心一啲技術性問題，所以唔敢追入。噚日見到經紀陳，問佢隻股有冇得諗。
經紀陳話，信利上次公布中期業績，股東應佔純利4587萬元，比去年同期跌咗7%，唔係太突出。
不過，公司老闆在業績報告中講明，話今年液晶體顯示器生意好到你唔信，可能會刷新公司盈利紀錄。如果今日信利公布嘅全年業績，真係好似佢老闆講得咁正斗，唔排除會借機炒番轉。
信利街貨極疏就係人都知，但疏得嚟又唔係有芬佬坐住，據聞只係有人坐咗一大部份。加上以現價2.90元計，PE成21倍，就算業績點靚都好，相信PE都唔會拉低太多。
基於上述兩個理由，小初對呢隻優質工業股，始終有多少戒心。
慕容小初