民主黨六名大佬，包括主席楊森、副主席李永達、何俊仁、立法會議員李華明、單仲偕同鄭家富，噚日響應因SARS鬧「血荒」嘅紅十字會呼籲去捐血。
李永達、單仲偕、鄭家富三個成日做運動，捐血當然冇難度，單仲偕噚日重係第二十五次捐血，攞埋紀念狀。紅十字會人員話，缺少運動嘅人血管會特別幼，李華明有名係叫「肥仔明」，何俊仁亦不遑多讓，搞到捐血站人員捉住佢哋條肥手臂，搵咗半日先摷到條血管。
大家乖乖坐低抽血，把口則好唔得閒，何俊仁喃喃自語：「我都唔算少做運動吖！」單仲偕即時玩踢爆：「你唔係少做，而係完全唔做運動。」與何俊仁同病相憐嘅肥仔明唔忿氣：「你咁多聲氣，唔啱一齊打場波比賽吓？」
楊森就最慘，竟然臨門撻Q，工作人員話佢血壓稍高唔捐得，令佢非常錯愕，因為自從佢九一年入立法會，每年都捐血，從未試過被拒，家陣接馬丁棒做黨主席唔夠半年，竟然血壓高？楊森估計自己唔夠瞓又多嘢做，兼且大前晚半夜兩點爬起身睇波睇到四點幾，所捧嘅曼聯重輸埋，唔怪得血壓飆高啦。
傳真︰2623-9278
電郵︰